Ang Balangkas ng 2 Timoteo 4:6-18
- Mawawala na si Pablo
- papalapit na ang kanyang pagpanaw
- nagawa na niya ang dapat niyang gawin
- makakamtan na niya ang gantimpala
- Mga bilin kay Timoteo
- Sikapin mong pumunta rito
- Si Lucas na lamang ang kasama ko
- Dalhin mo si Marcos
- …pati na ang damit na naiwan ko
- …at mga aklat, lalong-lalo na iyong mga gawa sa balat
- Mag-ingat kay Alejandrong panday
- Sikapin mong pumunta rito
- Ang nangyari sa aking unang pagharap sa hukuman
- nag-iisa lamang ako
- ngunit ang Panginoon ay nanduon upang iligtas ako
- Purihin ang Panginoon!
Maiksing Paliwanag
Ang 2 Timoteo 4:6-18 ay maaaring hatiin sa apat na bahagi: ang tt. 6-8 na kung saan isinasalarawan ni Pablo ang unti-unti niyang pagpanaw mula sa eksena ng mga panahon ng ganap na paninilbihan ni Timoteo (tingnan ang larawan ng konteksto nito mula sa pahinang ito); ang mga bilin kay Timoteo (tt. 9-15); ang salaysay ni Pablo tungkol sa kanyang unang pagharap sa hukuman (tt. 16-17); ang pagtatapos ni Pablo (18)
Ang konteksto ng 2 Tim. 4:6-7
Mapapansin sa ating Daloy ng Parirala na iba ang kulay ng mga tt.9-15. Ito’y dahil sa pagbasang liturhiko para sa ika-30 Linggo ng Taon K, ang mga talatang ito’y nilaktawan. Ang mga talatang ito’y binabasa sa tuwing ipinagdiriwang ang kapistahan ni San Lukas.
Nabanggit na natin na isa mga dahilan kung bakit kailangang maging handa si Timoteo sa kanyang tungkulin bilang obispo ay dahil sa pagsama ng panahon ng mga huling araw at ang pagkawala ni Pablo sa eksenang ito. Noon pa mang sinusulat niya ang liham na ito ay nararamdaman na niya ang unti-unti niyang pagpanaw, parang baterya ng “cellphone” na unti-unting nawawalan ng lakas, o — sa mga salita mismo ni San Pablo — parang bote ng alak na nauubos ang laman sa pagkakabuhos sa gawaing relihiyoso(sa Inggles “libation”). Nguni’t si Pablo ay hindi nanghihinayang sapagka’t nalalaman niyang sa paglapit ng kanyang kamatayan ay napapalapit na rin ang kanyang minimithing gantimpala, na ang Panginoon mismo ang magbibigay sa kanya (Ihambing sa Apok. 2:10; 3:11). Mapapansing ang pagtatapos ni San Pablo (t.18) ay inulit niya ang mga salitang ito.
Lima ang bilin ni Pablo kay Timoteo, dala na rin ng kanyang kalungkutan at pangangailangang pisikal at maipagpatuloy hanggang sa huli ang kanyang gawain. Si Lukas na lamang ang natitira sa kanyang tabi dahil ang iba’y nasa gawain (Cresente, Tito, at Tiquico) o kaya’y umalis dahil sa pagkahumaling sa mundo (Demas). Kaya’t ibinilin din ni Pablo na dalhin si Marcos. Sa mga talatang ito ay mapapansin ang pangalan ng dalawang ebanghelista (Marcos at Lukas), at isa pang obispo (Tito). Ang damit na tinutukoy ni Pablo sa t. 13 ay iyong damit na panlamig; hiningi rin niyang dalhin ni Timoteo ang kanyang mga aklat “lalung-lalo na iyong mga gawa sa balat”. Ang salitang ginamit para sa “mga aklat” ay biblia biblia. Hindi nasisiguro kung ang mga aklat na ito’y ang mga Kasulatan dahil para sa mga ito, ang tawag ni Pablo ay grafh graphe “kasulatan” (cf. 2 Tim. 3:16). Sa huli, bilin din ni Pablo na mag-ingat si Timoteo kay Alejandrong panday, dahil ito’y tutol sa kanilang ebanghelyo.
Hindi natin alam kung kailan at saan ginanap ang “unang” pagharap ni Pablo sa hukuman. Nag-iisa lamang siya noon nguni’t naramdaman naman ang Presensya ng Panginoon na nagligtas sa kanya sa “bibig ng leon”. Ang ekspresyon ay marahil na nagmula sa salaysay ng pagkakaligtas kay Daniel sa mga leon (Daniel 6). Sa 1 Ped. 5:8, ang leon ay simbolo ng demonyo. Dahil sa Presensya ng Panginoon, ang pagharap ni Pablo sa hukuman ay naging okasyon upang maipahayag niya ang ebanghelyo at maligtas sa kamatayan.
6 Sapagkat dumating na
ang panahon
ng pagpanaw ko
sa buhay na ito.
Ako’y mistulang isang handog
na ibinubuhos
sa dambana.
7 Pinagbuti ko
ang aking pakikipaglaban,
natapos ko na
ang dapat kong takbuhin,
at nanatili akong tapat
sa pananampalataya.
8 Makakamtan ko na
ang koronang nakalaan
sa mga matuwid.
Sa Araw na iyon,
ang Panginoon
ang makatarungang Hukom,
ang siyang magpuputong sa akin
ng korona;
hindi lamang sa akin,
kundi sa lahat ng nananabik
sa kanyang pagbabalik.
9 Sikapin mong
makapunta dito
sa lalong madaling panahon.
10 Iniwan na ako
ni Demas
dahil sa pagkahumaling niya
sa sanlibutan;
pumunta siya
sa Tesalonica.
Si Cresente naman ay nagpunta
sa Galacia,
at si Tito
sa Dalmacia.
11 Si Lucas na lamang
ang kasama ko rito.
Hanapin mo
si Marcos
at isama mo rito,
sapagkat malaki
ang maitutulong niya
sa aking mga gawain.
12 Pinapunta ko
sa Efeso
si Tiquico.
13 Pagpunta mo rito,
dalhin mo ang aking damit
na iniwan ko
sa Troas
sa bahay ni Carpo.
Dalhin mo rin
ang mga aklat ko,
lalo na iyong
mga gawa sa balat.
14 Napakasama
ng ginawa sa akin
ni Alejandrong panday.
Ang Panginoon
ang magpaparusa sa kanya
ayon sa kanyang ginawa.
15 Mag-ingat ka sa kanya,
sapagkat tutol na tutol siya
sa ipinapangaral natin.
16 Sa unang pagharap ko
sa hukuman
ay walang sumama sa akin;
pinabayaan nila akong mag-isa.
Patawarin nawa sila ng Diyos.
17 Ngunit sinamahan ako
ng Panginoon
at binigyan ng lakas
upang makapangaral nang lubusan
sa lahat ng Hentil,
at ako’y naligtas sa tiyak na kamatayan.
18 Ang Panginoon
ang magliligtas sa akin
sa lahat ng kasamaan
at siya rin ang maghahatid sa akin
nang ligtas
sa kanyang kaharian sa langit.
Purihin nawa siya magpakailanman! Amen.
Mga Tanong tungkol sa Teksto
- Kanino ang “tinig” sa mga talatang ito? Sino ang kanyang taga-basa?
- Makakasama pa ba ni Timoteo si Pablo sa mga panahon ng patuloy na pagsama ng mga tao?
- Ano na ang pakiramdam ni Pablo noong ginagawa niya ang liham? Malakas pa ba siya? Paano niya isinasalarawan ang kanyang unti-unting panghihina? Sa pag-unawa ba ng mga Judeo, ang kamatayan ay tulad ng pagpatay ng bumbilya?
- Nanghihinayang ba si Pablo? Ano ang kanyang inaasahang makamtan pagkatapos ng kanyang buhay dito? Saan pa matatagpuan sa mga Kasulatan ang ekspresyong “putong na korona” o katulad nito? Sino ang magbibigay nito? Kanino ibibigay ito?
- Lima ang bilin ni Pablo kay Timoteo, anu-ano ito?
- Nalulungkot ba si Pablo sa kanyang kinalalagyan?
- Balak pa rin ba ni Pablo na ipagpatuloy ang kanyang gawain?
- Maginaw na ba noong sinusulat ni Pablo ang liham?
- Sa pakiwari ba ni Pablo ay tatagal pa siya sa lugar na iyon?1
- Sa mga pangalang binabanggit ni Pablo sa tt. 9-15, sino-sino ang mga natatandaan mo?
- Sa una niyang pagharap sa hukuman, may nagtanggol ba kay Pablo?
- Masama ba ang loob ni Pablo sa mga nag-iwan sa kanya sa hukuman?
- Pinabayaan ba ng Panginoon si Pablo sa kanyang pag-iisa?
- May naaalala ka bang talata sa mga Ebanghelyo kung saan ipinangako ng Panginoon na hindi niya pababayaan ang kanyang mga saksi? 2
Print This Post 
Email This Post
- Oo. kaya nga’t hinihingi niya ang kanyang aklatan. [↩]
- Sa Lukas 21:14-15. Tingnan ang pahinang ito. [↩]
You must log in to post a comment.
{ 1 trackback }