Wasakin Ninyo ang Templong Ito (Juan 2:13-22)

Daloy ng Parirala Juan 2:13-22

Mga Katanungan tungkol sa Juan 2:13-22

1. Kailan umakyat si Jesus patungong Jerusalem?
2. Ano ang Araw ng Paglagpas? Ano ang ipinagdiriwang ng mga Judio sa araw na ito?
3. Ano ang tinungo ni Jesus sa Jerusalem?
4. Ano ang kaugnayan ng Templo sa Araw ng Paglagpas? ¹
5. Ano ang kanyang nakita sa Templo?
6. Ano ang dahilan at may mga tagapalit-salapi at nagtitinda ng hayop sa Templo?²
7. Ano ang kanyang sinabi sa mga nagtitinda ng kalapati? Ano ang dahilan at sila ang kanyang piniling pagsabihan?
8. Nagustuhan ba ng mga Judio ang iginawi ni Jesus?
9. Ano ang kanilang hiningi sa kanya?
10. Ano ang tandang ibinigay ni Jesus sa kanila?
11. Sa pang-unawa ni Ebanghelistang Juan, naunawaan ba ng mga Judio ang tinuran ni Jesus?
12. Ano ang Templong tinutukoy ni Jesus?
13. Ayon sa mga Kasulatan ng Bagong Tipan, kapag binanggit ang “Katawan ni Kristo” ano ang tinutukoy?
14. Kailan naunawaan ito ng mga alagad?

Maiksing Paliwanag

Ang salaysay ng paglilinis ni Jesus sa Templo ay inilagay ni Markos — na sinundan naman nina Mateo at Lukas — sa mga huling araw ng paninilbihan ni Jesus. Si Juan ang naglagay nito sa umpisa ng paninilbihan ni Jesus, pagkatapos ng unang tandang kanyang ginawa sa Cana (Juan 2:1-12). Samakatuwid, ang mga salaysay ng paninilbihan ni Jesus — sa pagkakaayos ni Markos — ay aabot sa sukdulan sa yugto ng kanyang pagpasok sa templo ng Jerusalem kung saan magiging maigting din ang kanyang pakikipagtuos sa mga lider ng mga Judio. Ayon kay Raymond Brown — eksperto sa pag-aaral ng ebanghelyo ni Juan — maaaring ang Ebanghelistang Juan ay mas tama sa kanyang ginawa.

Ang salaysay ng paglilinis ng Templo ay katulad ng matatagpuan sa ebanghelyo ni Markos, bagaman mas maraming detalyeng ibinigay si Juan. Ang kaibahan dito ay ang mga Kasulatang ginamit upang ipaliwanag ang kaganapan. Sa Markos (at Mateo), si Jesus ay sumitas ng mga talatang hinalaw mula sa Isaiah 56:7 at Jeremias 7:11. Sa Juan, hindi sumitas si Jesus, bagaman siya’y nagsabi ng mga salitang katulad ng mga talatang nabanggit:

Ilabas ninyo ang mga ito
at huwag ninyong gawing bahay-kalakal
ang tahanan ng aking Ama.

Si Jesus, kung gayon ay pumasok sa Templo bilang Anak na maglilinis ng bahay. Ang mga alagad ang nakaalala ng isang talata mula sa Salmo 69:10 — ang panalangin ng isang deboto ng Diyos na nagpapakasakit dahil sa kanyang pananampalataya.

Ang paghaharap ng mga Judio at ni Jesus sa susunod na yugto ay kay Juan lamang matatagpuan. Sa mga Sinoptiko (Markos, Mateo at Lukas), nagnasa ang mga punong pari at eskriba na patayin si Jesus, nguni’t hindi nila ito magawa. Sa Mateo, hinarap ng mga lider si Jesus hindi dahil sa kanyang ginawa sa Templo kundi dahil sa mga ikinakanta ng mga bata tungkolsa kanya.

Ang usapin sa paghaharap na ito ay tungkol sa isang “tanda”. “Ano” sabi ng mga Judio, “ang tanda na maipapakita mo bilang pruweba na may karapatan ka sa ginawa mong ito”? Sa Mateo at Lukas, ang tanda ay hiningi ng mga lider tungkol sa kanyang paninilbihan. Doon, ang tandang ibinigay ni Jesus ay ang tanda ni Jonas, a propetang sa loob ng tatlong araw ay nanatili sa kaibuturan ng Ades (tingnan ang Jonas 2, ang panalangin ng propeta sa sikmura ng balyena). Para kay Mateo ang tanda ay tumutukoy sa Muling Pagkabuhay. Kay Lukas, ang tanda ay si Jesus mismo na nag-aanyaya sa pagbabagong-loob. Dito kay Juan, ang tugon ni Jesus ay “Sirain ninyo ang templong ito at sa loob ng tatlong araw ay itatayo kong muli” (t. 19)

Hindi naintindihan ng mga Judio ang tinuran ni Jesus. Ang pagtukoy sa “Templo” ay may dalawang kahulugan. Katulad ni Nicodemos sa Juan 3, at ng Samaritana sa may Balon ni Jacob (Juan 4) ang hindi pagkakaunawa ay ginamit ni Jesus upang ituro sa kanila ang isang mas malalim na katotohanan. Ang tinuran ni Jesus ay naunawaan ng mga alagad pagkatapos ng kanyang pagkabuhay na mag-uli (t. 22). Ang tinutukoy ni Jesus ay ang kanyang Katawan na wawasakin ng mga Judio sa Krus nguni’t itatayo namang muli sa ikatlong araw.

Sa salaysay ni Markos tungkol sa paglilitis kay Jesus sa harap ng Sinedrio, may nagsabi na ipinakita raw ni Jesus ang kanyang paglapastangan sa Templo sa ganitong mga salita:

Wawasakin ko ang Templong ito na gawa sa kamay ng tao
at magtatayo ako ng isa pa na hindi gawa ng mga tao (Mk 14:58)

Naunawaan ng testigo na isang Templong espiritwal ang itatayo ni Jesus. Sa Juan, ang Templo ng Katawan ng Panginoon na itatayo sa ikatlong araw ay magiging dakong banal kung saan ang Diyos ay sasambahin sa espiritu at katotohanan (cf. Jn. 4:34). Ito ang Iglesya, ang kanyang Katawan: “Sapagka’t tayo ang Templo ng Diyos na Buhay” (2 Cor. 16:16; tingnan Col. 1:24 at Eph 2:19-22)

1. Ang Templo ay ang tanda ng presensya ng Diyos sa gitna ng kanyang bayan. Sa Araw ng Paglagpas ay ina-alala ng mga Judio ang pag-angkin sa kanila ng Diyos laban sa Faraon ng Ehipto. [↩]
2. Ang mga hayop ay ginagamit sa paghahandog, at ang mga ito’y binibili sa Templo gamit ang salaping pang-Templo lamang. [↩]

Tagged as: juan, katawan ni kristo, Templo